१३ कात्तिक, काठमाडौं । डिफेण्डिङ च्याम्पियन मनाङ मर्स्याङ्दी क्लब सफल पोखरा कप फुटबलको फाइनलमा प्रवेश गरेको छ । बुधबार भएको पहिलो सेमिफाइनलमा त्रिभुवन आर्मीलाई २-१ गोल अन्तरले पराजित गर्दै मनाङ फाइनलमा प्रवेश गरेका हो । अब उपाधिका लागि थ्रीस्टार र नेप्लिज फुटबल एसोसिएसन हङकङको विजेतासँग खेल्नेछ ।

पोखरा रंगशालामा भएको खेलमा मनाङले १२ औं मिनेटमा दीपक राईको गोलबाट अग्रता लिएको थियो । कप्तान सागर थापाको पासमा उनले गोल गरेका हुन् । खेलको ३३ औं मिनेटमा स्टफेनले भरत खबासलाई फल गरेपछि आर्मीले पेनाल्टी पायो । पनाल्टीमा राजु तामाङले गोल गर्दै खेललाई बराबरीमा पुर्‍याए । ६० औं मिनेटमा सुजल श्रेष्ठले वान भर्सेज वानमा गोल गर्ने मौका चुकाए ।

खेलको ८८ औं मिनेटमा विसाल राईले गोल गर्दै मनाङलाई २-१ को जित दिलाए । अनिल गुरुङको प्रहार आर्मीका गोलरक्षकले पूर्ण क्लीयर गर्न नसक्दा पाएको मौकामा विसालले मैदान प्रवेश गरेको तेस्रो मिनेटमा नै गोल गरेका हुन् ।