३ कात्तिक काठमाडौं । अख्तियार दुरुपयोग अनुसन्धान आयोगका प्रमुख लोकमान सिंह कार्कीले हालै गोरखकाली मन्दिरमा प्रहरी जवानले आफ्नो गोडा नधोएको दावी गर्नु भएको छ । केही सञ्चार माध्यमले आफ्नो चरित्र हत्या गर्न खोजेको उहाँको आरोप छ ।

आइतबार अख्तियारको फेसबुक पेजमा सन्देश दिँदै कार्कीले मन्दिर दर्शन गरी र्फकँदा लागेको रगत धुन खोन्दा आफ्नो शारीरिक अवस्था र साँगुरो ठाउँका कारण असजिलो भएपछि प्रहरी जवानले पानी हालेर सहयोग गरेको दावी गर्नु भएको छ । ‘म मन्दिर नर्शन गरी बाहिर निष्कँदा गोडाको रगत लागेको हुँदा गोडा धुन खोन्दा मेरो शारीरिक अवस्था र साँगुरो ठाउँका कारण असजिलो भएको देखेर पानीको जग लिएर एक प्रहरी जवानले मेरो खुट्टा नछोई माथिबाटै पानीसम्म हाली सहयोग गरेको बास्तविकतालाई मेरो व्यक्तिगत चरित्रमा आँच आउने गरी फोटो र समाचार प्रकाशन गरेको पाइयो’ उहाँले भन्नु भएको छ ।

केही सञ्चार माध्यम विभिन्न वहानामा आफ्नो चरित्र हत्या गर्ने प्रयासमा लागेको भन्दै उहाँले आफ्नो मौनतालाई कमजोरी ठानेर फेरि चरित्र हत्या गर्न खोजेको आरोप लगाउनु भएको छ । ‘यो नितान्त रुपमा चरित्र हत्या र मविरुद्ध षड्यन्त्रको नयाँ श्रृखला मात्र हो’ उहाँले भन्नुभयो-’भ्रष्टाचारविरुद्धको हालसालै अख्तियारको सक्रियताविरुद्ध केही पत्रिकाहरु लागेको सर्वविदितै छ ।’ रचनात्मक, तथ्यपरक र व्यवसायिक पत्रकारिताप्रति आफ्नो सम्मान रहने भन्दै उहाले पत्रकारिताको आवरणमा कसैको जीवन चरित्रमाथि धावा बोल्नु पीत पत्रकारिताको पराकाष्ठ हो भन्नु भएको छ ।

आफूले समान्ती प्रवृत्ति नदेखाएको भन्दै उहाँले आफू मन्दिर दर्शनपछि रहेको अवस्थामा जो कोही भएपनि उनको खुट्टामा पानी खन्याइदिनु आफूलाई आपत्ति नहुने बताउनु भएको छ । ‘प्रहरीको भूमिकाप्रति म पूर्ण सचेत छु । मैले कुनै पनि किसिमले सामन्त प्रवृति देखाएको छैन र आसय पनि छैन’ उहाँले भन्नु भएको छ ।