फेसबुकमा उमेद्वारलाई गाली गर्न पाइँदैन : प्रजिअ गौतम
१४ असोज, काठमाडौं । निर्वाचन कार्यक्रम प्रारम्भ भई उमेद्वारी दर्ता भएका दिनदेखि टि्वटर, फेसबुक, युट्युव र ब्लगलगायतका सामाजिक सञ्जालहरुमा कडा निगरानी गरिने काठमाडौंका प्रमुख जिल्ला अधिकारी वसन्तराज गौतमले बताउनुभएको छ । फेसबुक, टि्वटर र युट्युवलगायतका सामाजिक सञ्जालमा उमेद्वारहरुको समर्थन वा प्रशंसा गर्न सकिने तर कसैको विरोधमा प्रचार गर्न नदिइने गौतमले अनलाइनखबरलाई बताउनुभयो ।
‘निर्वाचन कार्यक्रम लागू भई उमेद्वारी
दर्ता गरिसकेपछि हामी सामाजिक सञ्जालमा कडा निगरानी राख्छौं ।’ प्रजिअ
गौतमले सोमबार अनलाइनखबरसँग कुरा गर्दै भन्नुभयो, ‘अहिलेसम्म फेसबुक र
टि्वटरमा जेजस्तो भए पनि उमेद्वारी मनोनयपछि कसैको विरुद्ध यसरी प्रचार
गर्न पाइन्न ।’ तर, सामाजिक सञ्जालमा कुनै पनि उमेद्वारको समर्थनमा वा
सकारात्मक विषयमा भने प्रचार गर्न पाइने उहाँले बताउनुभयो ।
चुनावी सुरक्षा योजना केही दिनमै
यसैवीच प्रजिअ गौतमले दुई/तीन दिनभित्रै
काठमाडौंको चुनावी सुरक्षा योजना सार्वजनिक गरिने बताउनुभयो । निर्वाचन
गराउने जिम्मेवारी जिल्ला निर्वाचन आयोग र प्रमुख जिल्ला अधिकारीको भएको
बताउँदै यहाँले चुनावी सुरक्षाको जिम्मेवारी आफूले निर्वाह गर्ने बताउनुभयो
।
राजधानीमा कार्यरत् ६० वटा मिडियामा आवद्ध
पत्रकारहरुका लागि आयोजना गरिएको दुईदिने चुनावी प्रशिक्षणमा उद्घाटन
मन्तव्य व्यक्त गर्दै सोमबार प्रजिअ गौतमले मुलुक अब निर्वाचनतर्फ होमिएको
बताउनुभयो ।
जिल्ला निर्वाचन कार्यालयले सोमबारदेखि
नयाँ बानेश्वरको इन्द्रेणी फाष्टफुडमा पत्रकारहरुलाई दुईदिनसम्म तालिम शुरु
गरेको छ । तालिममा टेलिभिजन, पत्रपत्रिका, अनलाइन र रेडियोमा आवद्ध
सञ्चारकर्मीहरुको सहभागिता छ । उनीहरुलाई निर्वाचन आचारसंहिता र चुनावी
रिपोर्टिङका विषयमा प्रशिक्षित गरिने आयोगले जनाएको छ । तालिमको उद्घाटन
गर्दै सोमबार काठमाडौंका मुख्य निर्वाचन अधिकृत एवं जिल्ला न्यायाधीश
अच्युत विष्टले आइतबारदेखि नै आफूहरु कार्यालय खोलेर काममा जुटेको
बताउनुभयो । ‘नयाँ बानेश्वरमा काठमाडौंका १० वटै निर्वाचन अधिकृतहरुको
कार्यालय खोलेर हामीले हिजैबाट काम शुरु गरेका छौं ।’ विष्टले भन्नुभयो ।
0 comments
Write Down Your Responses