समाचार » क्यान्सर पीडित छोरी भेट्न प्रचण्ड दिल्ली जाँदै

१२ मंसिर काठमाडौं । एकीकृत नेकपा माओवादी अध्यक्ष प्रचण्ड विहीबार बिहान दिल्ली जानुहुने भएको छ । दिल्लीमा उपचाररत क्यान्सरपीडित छोरीलाई भेट्न उहाँ दिल्ली जान लाग्नुभएको भएको हो । प्रचण्डकी जेठी छोरी ज्ञानु केसी क्यान्सरको समस्याले नोयडाको सेक्टर २ मा अवस्थित फोटिक्स हस्पिटलमा डेढ महिनादेखि उपचार गराइरहनुभएको छ । उहाँको लिभरमा समेत समस्या रहेको र डा. मनिषको निगरानीमा उपचार भइरहेको छ । उहाँलाई क्यान्सरको उपचारका लागि यसअघि अमेरिकासमेत लगिएको थियो । उहाँको अवस्था गम्भिर रहेको जनाइएको छ ।

छोरीको अवस्था जटिल बन्दै गएकाले प्रचण्ड उहाँलाई भेट्न विहीबार विहान १० बजे दिल्ली जान लाग्नुभएको एमाओवादीका केन्द्रीय सदस्य एवं प्रचण्डका स्वकीय सचिव चूडामणि खड्काले बताउनुभयो । खड्काका अनुसार प्रचण्ड शुक्रबारै स्वदेश फर्कने कार्यक्रम छ । उहाँका साथ सीता दाहाल पनि छोरी भेट्न जान लाग्नुभएको खड्काले बताउनुभयो ।

Labels: समाचार