समाचार » प्रतिपक्षमा बस्ने राप्रपा नेपालको घोषणा

१४ मंसिर, काठमाडौं । संविधानसभाको चौथो ठूलो दल राष्ट्रिय प्रजातन्त्र पार्टी नेपाल प्रतिपक्षमा बस्ने भएको छ । सबैभन्दा ठलो दल नेपाली कांग्रेसले आफ्नो नेतृत्वमा सहमतीय सरकार गठनको प्रयास गरिरहेका बेला कमल थापा नेतृत्वको राप्रपा नेपालले सरकारमा नजाने बताएको हो ।

‘हामी वैकल्पिक प्रजातान्त्रिक शक्तिका रुपमा स्थापित भएका छौं’ पार्टी कार्यालय धुम्बाराहीमा शुक्रबार आयोजित पत्रकार सम्मेलनमा थापाले भन्नुभयो-जनताले हामीलाई प्रतिपक्षमा बस्ने जनादेश दिएका छन् । हामी सत्ताको फोहोरी खेलमा लाग्दैनौं ।’

राप्रपा नेपालका अध्यक्ष थापाले नयाँ जनादेश अनुसार राष्ट्रपति, उपराष्ट्रपतिसहितका संवैधानिक निकायको नयाँ निर्वाचन गर्न समेत माग गर्नु भएको छ । साथै हैसियत अनुसार दलहरुबीच पद बाँडभाड हुनु पर्ने भन्दै उहाँले पाँच मध्ये एक पदमा पार्टीको दावेदारी प्रस्तुत गर्नुभयो ।

प्रत्यक्षतर्फ आफ्नो पार्टीका उम्मेदवाहरु हारेको तर एजेण्डाले जितेको भन्दै उहाँले संविधानसभामा शसत्त र रचनात्मक भूमिका खेल्ने बताउनुभयो । अघिल्लो संविधानसभाले गरेका निर्णयहरु स्वीकार्य नहुने भन्दै उहाँले भन्नुभयो-’मृत्युवरण गरेको संविधानसभाको विरासता बोक्न सक्दैन, पहिलो दिनबाटै हरेक विषयमा नयाँ शिराबाट बहस प्रारम्भ हुन्छ ।’ जनताले ०६२/०६३ आन्दोलनको बैचारिक अतिवाद र शक्तिलाई पनि कमजोर पारेको र आफूहरुलाई पनि बहुमत नदिएको भन्दै उहाँले मध्यमार्गी वैचारिक मागचित्र अनुसार अघि बढ्नु पर्ने बताउनुभयो । संवैधानिक राजतन्त्रसहितको प्रजातन्त्र र सनातन हिन्दु राष्ट्रको एजेण्डामा पनि सम्झौता हुन्छ भन्ने प्रश्नमा उहाँले भन्नुभयो-अहिले हामी हाम्रो एजेण्डामा प्रतिवद्ध छौं । तर, संविधान निर्माणमा सहमति र सम्झौताको पक्षमा छौं ।’

राप्रपा नेपालले संविधानसभा निर्वाचनमा गम्भीर विकृति र विसंगती देखिएको भन्दै छानविनको माग गरेको छ । पैसाले मत किनेको देखि मत पेटिका संकलन, व्यवस्थापन र गणनामा लापर्वाही भएको र यसले गम्भीर आशंका उब्जाएको भन्दै राप्रपा नेपालका अध्यक्ष थापाले आगामी दिनमा यस्तो हुन नदिन संसदबाट सर्वदलीय समिति गठन गर्न समेत गर्नु भएको छ । प्रत्यक्षमा भन्दा समानुपातितकमा ९ लाख ५७ हजार मत बढी देखिएको भन्दै उहाँले प्रष्ट पार्न निर्वाचन आयोगसँग माग गर्नुभयो ।

Labels: समाचार