तुर्कमिनिस्तान बाहेक अन्य तीन टोली नेपाल, इराक र बहराइनको छनोट हुने सम्भावना कायमै छ । १ जित र १ बराबरी खेलेका नेपाल र इराकको समान ४ अंक छ । गोलभिन्नतामा इराक अगाडी छ । फाइनल चरण पुग्न इराक र नेपाललाई जित्नै पर्ने दबाब छ । आइतबार इराक र नेपालले बेग्लाबेग्लै खेलमा बराबरी खेले पनि इराक गोलभिन्नताका आधारमा छनोट हुनेछ ।

इराक बराबरी र पराजित भए नेपालले तुर्कमेनिस्तानलाई हराएपछि फाइनल चरणमा पुग्नेछ । इराकले बिपक्षीको पोस्टमा १० गोल गरेको छ भने २ गोल सामना गरेको छ ।

नेपालले बिपक्षीको पोस्टमा ४ गोल गर्दै २ गोल सामना गरेको छ । १ खेल जितेको बहराइनको ३ अंक छ । अर्को वर्ष थाइल्याण्डमा हुने फाइनल चरण खेल्नको लागि आइतबार नेपाललाई जित आवश्यक छ । बराबरी नतिजाले पनि नेपालको फाइनल चरण पुग्ने सम्भावना गोलभिन्नतामा निर्भर रहनेछ । बहराइनलाई २–० ले हराएर उत्कृष्ट सुरुवात गरेको नेपालले इराकसँग २–२ को बराबरी खेलेको छ ।

बहराइनले तुर्कमेनिस्तानलाई ३–१ ले हराएर छनोट हुने सम्भावनालाई कायमै राखेको छ । बहराइनले इराकलाई हराएको खण्डमा नेपाल बराबरी वा पराजित भए बहराइन फाइनल चरण पुग्ने भाग्यमानी टोली हुनेछ ।

तुर्कमेनिस्तानले भने नेपाल विरुद्ध प्रतिष्ठाको लागि खेल्नेछ । अघिल्लो २ खेल हारेको तुर्कमिनिस्तानको १ खेल अगावै छनोट हुने सम्भावना सकिइसकेको छ।