हलिउडकी १९ वर्षीया नायिका कर्टनी स्टोडेनले आफ्ना ५३ वर्षीय श्रीमान् डग हचिन्सनलाई छाडिदिएकी छिन्। उनीहरूले तीन वर्षअघि विवाह गरेका थिए। तीन वर्ष लामो वैवाहिक जीवन टुंगिएपछि नायिका कर्टनीले त्यसको कारण पनि सार्वजनिक गरेकी छिन्। कर्टनीले बेलायतमा बिग ब्रदरमा सहभागिता जनाउने क्रममा श्रीमान्सँगको सम्बन्ध चिसिन थालेको बताएकी छिन्। 'मैले आफ्ना इच्छाहरू दबाइरहेकी थिएँ र म स्वतन्त्रता चाहन्थे,' सम्बन्ध विच्छेदपछि उनले भनेकी छिन्— 'अहिले म आराम महसुस गरिरहेकी छु।' गत नोभेम्बर ५ का दिन दुवैले अलग हुने निर्णय गरेका थिए। कर्टनीले सन् २०११ मा आफूभन्दा ३५ वर्ष जेठा अभिनेतासँग लस भेगासमा विवाह गरेकी थिइन्। त्यतिबेला उनको उमेर १६ वर्षको थियो। श्रीमान्सँग अलग भएपछि कर्टनीले आफूलाई जेलबाट मुक्त भएजस्तो अनुभव भैरहेको बताएकी छिन्।

आधुनिक यूगकी सुन्दरी

सेलिब्रेटी फोटोग्राफर टेरी ओ'नीलाई विश्वास गर्ने हो भने हलिउड सुपरस्टार एन्जेलिना जोली नै आधुनिक युगकी एकमात्र त्यस्ती सुन्दरी हुन् जसले पर्दाका महानायिकाहरू मर्लिन मुनरो र एवा गार्डनरसँग प्रतिस्पर्धा गर्न सक्छिन्। बेलायती फोटोग्राफरले आफ्नो सफल करियरका क्रममा विश्वका थुप्रै सुन्दरीका तस्बिर खिचेका छन्। उनका अनुसार आजको समयमा एउटी सुन्दरी त्यस्ती छिन् जो अरूभन्दा निकै माथि छिन्, उनी हुन् 'टम्ब राईडर' की नायिका एन्जेलिना जोली। ओ'नील भन्छन्— 'एवा गार्डनर, लाना टर्नर, मर्लिन मुनरोको सुन्दरता अति नै मोहक तथा गजबको थियो तर आजको समयमा जोली मात्र त्यस्ती युवती हुन् जो त्यही श्रेणीमा कायम रहन सफल छिन्।'

नाओमीको सौन्दर्य रहस्य

सुपरमोडल नाओमी क्याम्बेलले आफ्नो सुन्दर शरीरको रहस्य सार्वजनिक गरेकी छिन्। लामो समयपछि र्‍याम्पमार्फत मोडलिङ क्षेत्रमा पुनरागमन गर्ने यी मोडलले खानपिनमा नियन्त्रण गरेकै कारण आफ्नो शरीरलाई सुन्दर राख्न सफल भएको बताएकी छिन्। नाओमीका अनुसार हालै र्‍याम्पमा पुनरागमन गर्नुअघि करिब १० दिन उनले केवल जूस मात्र पिएकी थिइन्। एउटा अमेरिकी पत्रिकाका अनुसार ४३ वर्षीया यी मोडलको सुन्दरताको रहस्य नै जुस हो। उनी गाजर, अदुवा तथा अनारको जुस मात्र पिउँछिन्। त्यसो त नाओमीले लामो समयपछि र्‍याम्पमा प्रस्तुत हुँदा नर्भस भएको समेत उल्लेख गरेकी छिन्।

Labels: Hollywood, अचम्म संसार, ग्ल्यामर, मनोरञ्जन