समाचार » थुनुवा सुत्केरीको मृत्यु

काठमाडौ, मंसिर १५ - लागूऔषध कारोबार अभियोगमा नेपालगन्जस्थित कारागारकी थुनुवा ३६ वर्षीया देवीमाया शाहीको मृत्युपछि १५ दिने बालिका अभिभावकविहीन भएकी छन् । बालिकालाई महिला कैदी र बन्दीले संरक्षण दिएका छन् ।
कारागार सुरक्षार्थ खटिएका प्रहरी प्रमुख सइ खगेन्द्र बीसीका अनुसार भेरी अञ्चल अस्पतालमा सुरक्षित सुत्केरी भएकी देवीमायाको मंसिर ११ गते मृत्यु भएको हो । उनी मंसिर १ गते सुत्केरी भएकी थिइन् ।
देवीमायालाई ६ महिनाअघि लागूऔषध कारोबार अभियोगमा थुनुवाका लागि कारागार ल्याइएको थियो । तेह्रथुम माइती भएकी उनले पछिल्लोपल्ट भारतीय नागरिकसँग विवाह गरेको प्रहरीले जनाएको छ । त्यसअघि देवीमायाको भैरहवामा विवाह भएको र छोरा रहेको प्रहरीको दाबी छ ।
'सुत्केरी हुने समयमा कारागारबाट अस्पताल पुर्‍याइएको थियो । हामीबाट हुने सबै सहयोग गरेका थियौं तर सुत्केरीपछि उनको मृत्यु भयो,' सइ बीसीले भने, 'देवीमायाको मृत्युपछि बच्चीको स्याहारमा समस्या भएको छ । महिला कैदीबन्दीले आफूसँग राखेका छन् ।' महिला कैदी र थुनुवाले बच्चालाई सम्हाल्न निकै समस्या रहेको बताएका छन् । आमाको दूध खान नपाएर बच्चा रोएर हैरान पार्ने उनीहरूले बताए । बच्चालाई बाहिरबाट ल्याएको दूध खुवाएर राखिएको कारागारले जनाएको छ । थुनामा राख्न कारागार ल्याएकी देवीमायाले आफू गर्भवती नभएको महिला कैदीबन्दीलाई बताउँदै आएको प्रशासनको दाबी छ । उनले आफू मोटाएको बताउँदै आएकाले नियमित स्वास्थ्य परीक्षणसमेत गराएकी थिइनन् । गर्भवतीका बेला खानपानमा ध्यान नदिँदा, थुनुवा बस्दा मानसिक तनाव र नियमित स्वास्थ्य परीक्षण नगराउँदा देवीमायाको मृत्यु भएको कैदी र थुनुवाको शंका छ ।
मृत्युको ३ दिनपछि शुक्रबार भैरहवाका एक आफन्तले शव बुझेको कारागारले जनाएको छ । बच्चाको जिम्मा लगाउन उनका अरू आफन्तको खोजी गरिरहेको कारागार प्रशासनले जनायो । मृतक देवीमायाकी बहिनी सम्पर्कमा आएको तर शुक्रबारसम्म बच्चा नबुझेको प्रहरीले जनाए । जिल्ला जनस्वास्थ्यका प्रमुख जीवनकुमार मल्लले घटनाबारे जानकारी नभएको बताए । उनले थुनुवा सुत्केरीको मृत्युबारे जिल्ला प्रशासनबाट बुझ्ने बताए ।

0 comments

Write Down Your Responses