'एमाओवादीले भोट माग्न घुम्टो ओढेर आउनुपर्छ'

एमाले बरिष्ठ नेता माधवकुमार नेपालले एमाओवादीले जनतामाझ फेरि भोट माग्न आउन नसक्ने बताएका छन् ।
'कुन मुखले भोट माग्न आउँछन् उनीहरु ?,' काठमाडौं- २ को चुनावी अभियान लिएर नाङ्लेभारे पुगेका उनले भने, 'जनतासँग भोट माग्न अब घुम्टो ओढेर आउनुपर्छ ।' उनले एमाओवादीका कारण संविधानसभा विघटन भएको आरोप लगाए ।
एमाओवादी जातीय दंगा भड्काउने, राष्ट्रिय एकता तोड्ने, सामाजिक सदभाव बिथोल्नेतर्फ उद्दत रहेको उनले बताए । नेता नेपालले विदेशीको दलालीका लागि एमाओवादीले जनताविरुद्ध षड्यन्त्र गरेको आरोप लगाए ।
नेता नेपालले बिहीबारदेखि नाङ्लेभारे, लप्सीफेदी, बज्रयोगिनी गाविसमा घरदैलो गरेका छन् । उनले बज्रयोगिनीमा अन्तर्राष्ट्रियस्तरको विद्यालय निर्माण कार्य सुरु गरेको जानकारी दिए । आफू प्रधानमन्त्री हुँदा यस क्षेत्रमा छुट्याएको डेढ करोड रुपैयाँ माओवादी सरकारले रकमानन्तर गरेकोमा उनले आपत्ति जनाए ।
नेता नेपालले एमालेले सुरु गरेको बृद्धभत्तालाई मासिक एक हजार रुपैयाँ पुर्‍याउने जानकारी दिंदै गाविसलाई दिइने अनुदान पनि ५० लाख रुपैयाँ पुर्‍याउने जानकारी दिए ।

Labels: समाचार